Кілегейлі тұздықта піскен теңіз ирекшелері

Бүгінгі мәзірде нағыз деликатес. Теңіз ирекшелерін  кілегейлі тұздықпен пісіреміз. Айтулы оқиғаларға жайылған дастарханның сәні болатыны еш күмәнсіз.

Теңіз ирекшелері (морские гребешки), әрине, күнделікті дайындалатын тағамдарға жатпайды. Кейде дүкендерде таңсық тағамдарды көргенде, "оны қалай пісіреді", "немен ұсынады", "жұмысы көп шығар" деп сырт айналып кетеміз. Бірақ, теңіз ирекшелері мүлдем олай емес. Дайындалуы өте оңай, тез піседі және песто тұздығы және киеуіл (каперс) қосылған кілегейлі тұздық оның балғын дәмін аша түседі. Гарнирге жас үрме бұршақ ұсынамыз.

Құрамы және дайындалу тәсілі:

	Құрамы: Теңіз ирекшелері - 500 гр. Сары май - 2  ас қасық Ұн - 2 ас қасық Кілегей 20% - 150 мл. Песто тұздығы - 1 ас қасық Киеуіл - 1 ас қасық Гарнирге: Мұздатылған жас үрме бұршақ - 300 гр.
	Песто тұздығы және киеуіл
	Теңіз ирекшелеріне тұз бен бұрыш себеміз (аздап қана).
	Екі жағынан ұнға аунатамыз
	Табаға майды салып, жақсылап қыздырамыз. Теңіз ирекшелерін табаға салып, қуыра бастаймыз. Отты біраз азайтуға болады.
	Бір жағы қызарғанда, екінші жағын аударамыз.
	Асты қызарғанда песто тұздығын саламыз. Ақырындап араластырамыз, бірақ ирекшелерді аудармаймыз.
	Енді дәл солай киеуілді қосамыз.
	Бірден кілегей құямыз. Оны да қатты араластырмаймыз.
	Кілегей қайнағанда тұздық қоюлана бастайды. Сол кезде отты өшіреміз. Көп пісірудің қажеті жоқ.
	Қайнап тұрған тұзды суға жас үрме бұршақты саламыз, 7-8 минут пісіріп, сүзіп аламыз.

Осымен тағамымыз дайын!

Астарыңыз дәмді болсын!