Gourmania: Ұлттық тағам

Жүректен көбіне тек қуырдақ сияқты тағамдар істеп жатамыз. Ал сол жүректен керемет ұлттық тағам жасалатынын бірі білсе, бірі білмейді.

Gourmania.kz аспаздық блогында Ұлттық тағамнан соңғы рет Қуыс құлақ жасалған болатын. Бүгінгі таңдау Үлпершек деген тағамға түсті.
Бұл тағам туралы ақпарат өте аз болды және әр жердегі жазбалар жасалу жолы өзгешеленіп жатты, бірақ барлық нұсқасында да суға пісіріп жатты. Ал мен пешке пісіріп көрейін дедім. Сол себепті осы тағамды әзірлеудің өз нұсқамды ұсынып отырмын.

Жалпы Үлпершек деген - салмасы бар жылқының жүрегі. Мен салмасы ретінде қазы, жылқының майсыз қара етінен және пияз салдым. Бұл тағам өте тойымды болып келеді. Сондықтан неғұрлым жеңіл гарнир ұсынғаныңыз жөн болады. Мысалы, картоп, күріш, қарақұмық немесе макаронның орнына шикі немесе буға/суға піскен көкөністер ұсынған жөн болады. Мен жүгерімен ұсындым.

Үлпершек ұлттық тағамының құрамы:

Жылқының жүрегі - 1 дана,
Қазы - 100 гр.,
Жылқының қара еті - 100 гр.,
Пияз кішкентай - 1 дана,
Қолдың қаймағы - 2-3 ас қасық,
Жүгері - 2-3 дана,
Тұз, бұрыш,
Аскөк.

Дайындалуы:

	Жүректің бір жағын тіліп, жүректі ашамыз. Қалыңдау жерлерін кесіп тастаймыз. Сонда жалпақ болып шығу керек.
	Асүйлік балғамен жалпақтап кішкене ұрғылаймыз.
	Салмасын дайындаймыз. Жылқының етін, қазысын және пиязды ұсақтап турап, тұз бен қара бұрыш саламыз.
	Жүректің ортасына сопақтап салманы саламыз.
	Жүректі бастапқы пішінге келтіріп, жіппен ораймыз. Қаймаққа тұз бен қара бұрыш саламыз.
	Пісіруге арналған пакетке жүректі саламыз.
	Пакеттің ішіндегі ауасын шығарып, аузын мықтап жабамыз. 180°С-та қызып тұрған пешке 1,5-2 сағатқа қоямыз. Пісуі етіңізге байланысты, жас малдың еті болса тезірек піседі, оны пісіру барысында бақылап отырасыз. Шамамен бір сағаттан кейін пакеттің бетін тіліп, жүректі аударып отыру керек.
	Жүректі пакеттен шығарып,
	жіптерін кесіп тастаймыз.
	Тілімдерге бөлеміз.
	Жүгеріні 180°С қызып тұрған пешке 25-30 минутқа қоямыз. Одан артық қоймаңыз, жүгері кеуіп кетеді. Немесе 15-20 минут суға пісіруге болады.
	Жүгері дәндерін пышақпен кесіп аламыз.
	Жүгеріге аскөк және жүректің пакеттегі сөлін тұздық ретінде 1-2 қасық құямыз. Осымен тағамымыз дайын.