Қазақтың ұлттық тағамы - Жаппа

Көп дайындала бермейтін, көбі біле бермейтін қазақтың ұлтық тағамын дайындаймыз. Жаппа немесе кей кездері шымшыма деп те аталып жатады. Өзімнің енгізген жаңалығым - дастарханға ұсыну үлгісі. Әр порциясын жеке-жеке жаппа қамырдың ішіне салып ұсындым. Меніңше, мерекелік дастарханда керемет көрінетін, ерекше тағам болып шыға келді.

Соңғы рет Итальянша фрикадельки тағамын әзірлеген болатынбыз, енді қазақтың ұлттық тағамын әзірлеуге уақыт келген сияқты.
Жаппа ұлттық тағамының ерекшелігі - қазандағы тағамдарыдың үстін қамырмен жауып пісірілуі, атау да содан шыққан. Ең дәмді жері де дәл осы қамырында. Өйткені қамырлардың әр қабатына сары май жағылған. Сорпаға піскен жайма сияқты жұмсақ және майға піскен шелпектей майлы да болмайды, соның дәл ортасында. Шамалы қатқыл, әрі сары май иісі мен дәмі керемет шығып тұрады.  Сондықтан, бұл тағам үшін сары майды өте мұқият таңдау керек. Тек қана қолдың сары майы болу керек. Дүкендегі ақ майдың дәмі бәрібір ауылдың сары майына жетпейді.

Gourmania аспаздық блогында ұлттық дастарханнан соңғы рет - Ашыған көже және ашыған бауырсақ ұсынылған болатын.

Жаппа ұлттық тағамының құрамы:

• Ет - 500-600 гр.,
• Пияз - 1 дана,
• Сәбіз - 1 дана, 
• Тәтті бұрыш - 1 дана,
• Картоп - 600-700 гр.,
• Тұз, бұрыш, аскөк.

Қамырына:

• Ұн 1-1,5 стақан,
• Жұмыртқа - 1 дана,
• Тұз - 0,5 шай қасық,
• Су - 1-2 ас қасық.

Қамырлардың арасына жағуға:

• Сары май - 50-60 гр.

	Майы бар қызып тұрған қазанға етті қуырамыз.
	Еті піскенше, көкөністерді турап дайындаймыз.
	Ет піскеннен кейін сәбіз бен пиязды саламыз. Сәл қуырамыз.
	Тәтті бұрышты саламыз.
	Еттің жаймасы сияқты қамыр илейміз, иі қанғанша 15-20 минутқа жауып қоямыз.
	Жарты кеседен сәл көп су құямыз, су картоптың бетіне шығып кетпеу керек.
	Қамырды бес бөлікке бөліп, өте жұқа жаямыз.
	Сары майды ерітіп, әр қабатына жағып, бір-бірінің үстіне қоямыз.
	Картоп шала піскен кезде, қамырларды сол күйінде алып, картоптың үстіне қоямыз. Суы картоптың үстіне шықпау керек дегенім осы, картоптан шығып тұрса қамыр суға малынып, езіліп кетеді. Қамырымен қоса тағы 15-20 минут пісіреміз.
	Жаппаны дастарханға да жаппа түрінде ұсындым. Тәрелкеге бір қамырды қоямыз, үстіне бір жартысына қуырдағын саламыз да, екінші бос жағымен жауып қоямыз. Үстіне аздап аскөк себеміз.

Жақындарыңызды дастарханға шақыра беріңіз)

Негізі, біз қамырына тоймай қалдық)) сондықтан қамырына берілген тағамдарды екі еселеп алып, көбірек істеуге болады.

Қазақтың ұлттық тағамы - Жаппа

Астарыңыз дәмді болсын!

---

Оқи отырыңыздар:

	Дәруменді микс немесе "ғарышкердің таңғы асы"
	Француздық пиязды сорпа
	Жульен бәліші
	Ұлттық тағам - Қарма