Gourmania: Бананды нан/Banana bread

четверг, 8 января 2015 г.

Бананды нан/Banana bread

АҚШ-та және Австралияда көп таралған тәтті пісірме түрлерінің бірі - бананды нан. Аты айтып тұрғандай, ең басты құрамдас бөлігі банан. Банан неғұрлым езіліп, жұмсарып тұрса, бананды нан соғұрлым тәтті болады. Бірақ, нан дегенмен, көбірек кекске ұқсайды.

Құрамы:

Банан - 3-4 дана,
Қоңыр немесе ақ қант - 1/2 стақан,
Сары май - 100 гр.,
Жұмыртқа - 2 дана,
Ұн - 250 гр.,
Қамыр қопсытқыш - 1 шай қасық,
Тұз - 1/4 шай қасық,
Грек жаңғағы - 1 стақан.

Жасалу жолы:

	Бананды вилкамен езіп, қантпен араластырамыз.
	Сары майды ерітіп, бананды қоспаға қосамыз, үстіне жұмыртқа қосамыз. Формаға май жағып, ұн себеміз. Пешті 170°С-та қыздырып қоямыз.
	Ұнға қопсытқышты және тұзды қосып, елейміз. Бананды қоспаға араластырамыз.
	Ұн біркелкі араласқаннан кейін грек жаңғағын саламыз.
	Қамырды қалыпқа құйып, қызған пешке 45-50 минутқа қоямыз.
	Піскенін бамбук/ағаш таяқшаны тығып тексереміз. Таяқшамыз құрғақ шықса, кексіміз дайын. Сәл суығаннан кейін, кекс дастарханға жол тартуға дайын.