Безе немесе меренга

Құлпынай қосылған тарт жасағанда жұмыртқаның ақуыздары қалған болатын, сондықтан, безе - соны іске жаратудың амалы)))

Безені білмейтініміз жоқ шығар. Кішкентай кезімізден таныс, Кеңес дәуіріндегі "Бакалея", "Экспресс" дүкендерінде толып тұратын десерт. Кішкентай кезімнен есімде, анам осы безені сатып әперетін. Ол кездікілер үлкен және екеуі арасында сары май мен қант араласқан креммен жабысып тұратын, сырты қытырлақ, іші жұмсақ болатын. Әлі күнге дейін есімде!

Безе мен зефирді үнемі шатастыратынмын)

Безені меренга (фр. - baiser, meringue) деп те атайды. Бұл десертің түп-тамыры Францияда жатыр. Бірақ безенің сіңісіп кеткені соншалық, өзіміздің, "советский" болып көрінеді))

Мен безені сәл қоңырқай түсті етіп пісірдім (негізі безені пісіру дегеннен, кептіру деген дұрысырақ болар), сонда дәмі карамельді болып тұрады. Ал ақ болып кепсін десеңіз температурасын азайтасыз. Ол туралы нақтырақ төменде жазып кетемін. Үстін сәндеуге сүтті шоколадқа қарағанда, ащы қара шоколад жақсы үйлеседі, өткені безе өте тәтті болғандықтан бір ыщылық дәм беріп тұрған жақсы. Немесе жидектермен ұсынған жақсы, бұнда да безенің тәп-тәтті дәмі қышқылдау жидектермен жақсы үйлеседі.

Сонымен, безенің құрамы:

• Жұмыртқаның ағы - 2 дана,
• Қант - 1/5 стақан,
• Ванилин - пышақтың ұшымен,
• Лимон - 2-3 тамшы (лимон қышқылы - пышақтың ұшымен) немесе тұз - пышақтың ұшымен.

Сәндеу үшін:

• Қара шоколад 70% - 10-20 гр,
• Сүт - 1 шай қасық.

Жалпы безе жасаудың еш қиындығы жоқ, бірақ келесі ережелерді сақтамасаңыз, еңбегіңіз зая кетуі мүмкін.

Безе істегендегі ұстанатын басты ережелер:

• Жұмыртқа сақталу мерзімі 1 аптаға дейін болу керек;  
• Жұмыртқаның ақуызы суық болу керек;
• Безе дайындайтын ыдысыңыз және құралдарыңыз құрғақ болу керек - май да, су да болмау керек;
• Жұмыртқаның ағын сарысынан өте мұқият бөлу керек, бір тамшы саруыз түсіп кетсе де, жақсы көпірмей қалады;
• Қант ұсақтау болған жақсы, қант пудрасы болса, тіпті жақсы;
• Жұмыртқаның көпірігі тығыз болып және отырып қалмау үшін, тұз,лимон шырынын немесе лимон қышқылын қосу керек; 
• Дайындық шараларын, жұмыртқаны араластырмай тұрып жасап алу: пешті қыздыру, кондитерлиік шприц/қап немесе екі үлкен қасық, пештің табағына пергамент жайып қою немесе табаға жұқалап өсімдік майын жағу. Кері жағдайда жұмыртқаны көпіртіп қойып, дайындық шараларын жүргізгенше ақуыз отырып қалады;
• Соңғы кеңес дайын безеге қатысты - безе ылғалдан "қорқады", сондықтан дайын безені қақпағы тығыз жабылған контейнерде сақтаңыз, ал ылғалданып кеткен жағдайда пешке салып, тағы бір кептіріп алуға болады.

Меренганың дайындалу жолы:

1. Безе аппақ болсын десеңіз пешті 80-90°С-та , ал суреттегідей қоңырқай болсын десеңіз - 100-110°С-та қыздырасыз. Дегенмен, әр пеш әр қалай қыздырады, сондықтан мұқият болыңыз, тым ерте қызарып бара жатса, қызуын азайтыңыз;
2. Жұмыртқаның ағын миксермен араластырамыз, 2-3 минуттан кейін ағарады;
3. Ақуыз жақсы көпірген кезде, қантты біртіндеп 1 ас қасықтан саламыз. Әр қасықты салған сайын 30-60 сек-тан араластырып отырамыз;
4. Барлық қант салынғаннан кейін лимон шырынын/тұз саламыз;
5. Ыдысты төңкергенде төгілмейтіндей қою болғанша араластырамыз;
6. Дайын болғаннан кейін пергаментке салып шығамыз да, пешке 1,5 сағатқа қоямыз. 1,5 сағат өткеннен кейін, пештің есігін ашып қойып тағы жарты сағатқа қалдырыңыз;
7. 1,5 сағат өтсе де жұмсақтау болуы мүмкін (әсіресе үлкенірек безелер), суығаннан кейін кеуіп, қытырлайды;
8. Шоколадты ерітіп, сүтпен араластырып, үстін сәндейсіз.

Безе немесе меренга

---

Оқи отырыңыз:

	Маковец - көкнар орамасы
	Асүйдегі тайм-менеджмент. Қорытынды